軍營介紹 - 大專
生命建立，埋身肉搏
Kim & Sam @ Yr.2 Phospher
Kim：我2021年成為新手導師，好感恩我有好拍檔Meigi同今日嘅Phosphor小組。 第一年係蜜月期，睇見大家由泛泛之交去到稱兄道弟(稱姊道妹)，隨著時間的建立 和投入令大家嘅感情昇華。慶幸得到組員嘅信任，第二年開始，同我分享佢哋嘅 掙扎，例如感情、自我價值、迷惘、試探、信仰低谷、關係、前途等等，做導師 要投入好多時間同情感去同佢哋同行，雖然有時唔懂得處理，有時好D會處理到， 但見到佢哋每一個人嘅成長，我睇到神嘅恩典。而且，我牧養佢哋嘅同時，亦都 俾佢哋牧養，從佢哋身上學到好多做人應該有嘅堅持同嘗試。有時候同佢哋相處 就好似照鏡咁，對住Sam就好似對住年輕嘅自己。所以我會用我過來人嘅身分話俾 佢知， 唔洗迎合人去得到自己嘅價值。 記得有一晚， 佢喺我屋企sleepover， 傾咗好多深入嘅話題，傾到凌晨四點半。與其叫做「牧養」，不如叫「一齊經歷」 更貼切。我享受同佢哋繼續同行，多謝每位Phosphorer， 感謝神！
Sam：Kim係一個人生經驗好豐富嘅導師，處事好圓滑，唔會得罪人。佢仲好積極 融入青少當中，即使sem尾小組好少人返，但係佢仍然熱情不減，好想凝聚我哋 成組。 所以都想話佢知道， 就算有一日佢唔喺到， 我哋都會努力維繫小組組員 彼此嘅關係。佢好識照顧組員，無論係日常生活定係人生嘅難題，佢都好識回應。 記得有一晚， 我喺佢屋企同佢傾到好夜， 佢教我好多點做人生抉擇。 如果要用 戰場上嘅一個角色形容佢，我估佢唔單止係負責決策，更會親自落場。
知已知彼，並肩作戰
Dorcas & Eunice - Yr.3 Follower
Dorcas：因為彼此父母都認識， 所以我細個已經認識Eunice， 不過印象好模糊。依家嘅佢變得更成熟，作為信二代，我哋好容易 質疑好多嘢。但係佢係自己嘅經歷裡面好感受到神，佢好順服天父 俾佢生命嘅安排，又會探討自己嘅靈命成長。我以前都唔係好知道 自己返教會係做咩，好似係為咗聽話，或者為咗唔好令小組太冷清 而返。但係記得一次敬拜讚美會後，Eunice同我講，其實我嘅角色 都好重要。原來係因為我嘅邀請，佢先再次返番教會。我哋都唔習慣 做主動，但係多謝佢先主動關心我，我先會再去關心組員。我明白 我哋彼此都好唔習慣主動關心組員。成為組長後，我相信我哋可以 一齊努力嘗試。
Eunice：一直認識嘅心祈好靜、好內向、好有禮貌，細個成日見佢 自己坐喺一邊畫畫。佢曾經都係一個會自我質疑、否定、收埋自己 嘅人。2022年係佢轉變得最多嘅一年，猶其後尾成為組長，見到佢 學識表達同肯定自己、適當拒絕人。依家佢更會主動關心好多組員， 同人建立關係。 我都係後嚟先知道， 原來佢好努力踏出舒適圈。 佢好為人著想，有時諗其他人仲多過自己，但我相信再強嘅人都會 想有被照顧嘅時候，如果佢可以更放開自己係「家姐」、「組長」、 「照顧者」嘅身份，好好感受別人俾佢嘅讚賞同照料∼好想話俾佢 知道，其實佢好重要。我係因為佢，先重新返番教會㗎。
整裝上陣
Kelly @ Yr.3 Teen Teen 愛神
喺組長呢個事奉裡面，我學習到自己要將焦點放返喺神身上。 我有試過放好多心力喺小組， 但後來越嚟越多人因為讀書而 離開咗，自己都幾失落。但感恩身邊一直有兩個導師同我同行， 佢哋比我更用心愛我同埋啲組員，都教我身為組長其實唔係要令 組員去返小組嘅人，因為組員返唔返都只係神嘅安排，我要做 嘅只係做好本分。依家嘅我都依然渴望有更多組員一齊同行， 但我要學習順服神嘅旨意。好似我喺敬拜隊見到嗰個不斷喺唔同 event幫手嘅人一樣，不求回報，只做一個忠心嘅僕人。另外， 我需要操練嘅係返到神裡面去安息， 我嘅生活真係好忙碌， 感受到好多疲累同無力，就算有時間返崇拜都俾啲思緒纏繞住， 投入唔到，所以今年目標係學習懂得喺佢裡面安息。
整裝上陣
Alyssa @ Yr.3 Shepherd
自己係一個信二代，自小就跟爸媽返教會，到中學 階段先真正認識信仰多一啲， 喺Year2嗰年成為 小組組長，到依家已經兩年。過往喺信仰上都有 好多浮浮沉沉嘅階段，但好多小組組員對信仰嘅 熱誠都感染咗我， 讓我對信仰嘅眼光唔同咗。 以前返教會只係習慣，為返而返，但經歷到小組 組員彼此之間嘅互相守望同埋支持。雖然喺升上 大專嗰陣經歷合組，但感恩嘅係當中嘅相處同埋 適應都比想像中容易。 成為組長之後， 自己都 仍然學習緊點支持其他組員。
自己喺信仰上都希望可以建立更穩定嘅靈修習慣， 同神keep住交流。好多時候都會因為忙碌而忘記 咗神，希望自己可以認識神更多，更多操練祈禱 尋求佢嘅旨意。同時都希望小組除咗查經之外， 可以有機會一齊靈修，一齊keep住喺神裡面。
整裝上陣
Mary @ Yr.1 Elijah
喺返教會呢八年， 一直都知道神係愛我， 但原來 頭腦上嘅知道唔等於已經感受到， 更唔發覺自己 一直都冇俾神嘅愛感動自己。回望過去，我對自己 嘅生命有好多唔滿意嘅地方，都有其他人責備我嘅 時候， 所以好想做得好， 追求正確、不變嘅嘢。 喺做組長嘅時候透過預查了解神更多， 但係一路 以嚟嘅追尋入面，我冇包容或者正視自己嘅情緒。 當有疲乏、負面情緒嘅時候，我會自我審查，然後 再去隱藏呢啲情緒。 原來去擁抱呢啲情緒之先， 要真真正正俾神治癒。喺升上大學之後，開始思考 多咗點樣愛自己、接納自己，嘗試用神愛人嘅方式 愛自己。我發現自己唔係要化身老師，教自己應該 點做，或者係咁壓抑情緒，而係真正讓神嘅愛用喺 愛自己身上，就能夠治癒受傷嘅自己，經歷真正嘅 愛同包容，振作再作精兵，愛身邊嘅鄰舍！
