唔經唔覺喺青少部做咗幹事3年，不過其實做咗幾多年都好，人生總係有野要學，要進步！我個性比較安於現狀同平穩，但工作中總係少不免有突發事件同長期繁忙🙈每當遇到呢啲狀況，我就會好慌亂， 十分緊張，唔識溫柔地表達。所以今年希望心靈操練到可以對神多啲信心！唔會慌唔緊張！突發時都淡定啲溫柔啲～而身體操練除咗Firm 啲、健康啲、體能上都想強啲、”長氣”啲~ 起碼逆旅可以”哼鬆””冇難度”~ 😎
文／文芷珊 幹事 2023
《真心感動同感恩》
喺時實體時網上嘅時代，教會運作同牧養上都有挑戰/機遇~先講挑戰吧！個人方面，我入職青少部2年多d，喺我入職兩個月未夠就出現疫情，對我呢個做開文職工作嘅科技傻子嚟講緊係大挑戰！而牧養上，有d團友的確好唔適應網上聚會，所以少咗參與，當然會擔心佢地慢慢離開 (尤其我係一個好重情嘅人) … 不過網上都有網上好！有d喺外國，或之前要補習/有活動嘅人，轉為網上變相可以一齊參與！甚至有d新朋友/好耐無返教會嘅人，正因為呢段時間嘅經歷而返嚟，想尋找神嘅盼望！真心感動同感恩。
文 / 文芷珊 幹事 2022
《光…除掉黑暗》
「光除掉黑暗」其實係一首歌《求主給這世代看見異象》嘅歌詞~ 我個人幾鍾意唱歌, 所以好多時聽到一D字就會聯想到一D歌~ 聽落、感覺同表面睇落, 我個人好似幾樂觀可~ 但熟我嘅人就知道, 其實由細到大我都係一個無咩希望/盼望嘅人, 比較灰暗… 而今年度主題卻係「Be the light」(成為別人的「光」), 當我聽到嘅時候, 我就諗: 但係我自己心入面都無光, 尤其喺上年我又跌入咗我黑暗嘅洞入面… 我點樣去成為人哋嘅光呀…? 當時我真係咁求問神, 求神幫我。
原來神正正就係透過呢一次黑暗嘅旅程帶我去光明! 上年因著不少事情發生, 自己情緒上出現咗問題… 但正因為咁, 我先真正進入我嘅人生, 真正去面對我內心同情緒上嘅問題。 呢D問題原來已經唔係第一次喺我人生出現... 但我以前唔識亦唔知原來要處理, 直至到呢幾年喺青少部生活, 先知道原來自己係會對不安嘅事、物、情景, 什至係人… 選擇逃避… 但感恩神將我帶嚟青少部, 係佢地話我知無論咩事佢地都會陪住我去面對; 係佢地話我知, 我係有價值; 係佢地話我知, 不論我係點, 即使我覺得自己唔值得被愛, 佢地都仍然會接納我、愛我! 唔淨至青少部童工, 就連喺青少部嘅青少同導師們, 佢地成日都好關心我! 一見我有咩唔妥, 就會即刻搵我同陪我💖 我唔笑, 佢地會撩我笑~ 我喊, 佢地會為我而喊😭 我成日都話, 佢地真係好好好好! 佢地比我嘅愛其實遠遠超過我能夠比佢地嘅愛! 青少部 ─ 就係一個能夠比我地可以喺喥成長, 坦誠面對自己, 願意陪你面對問題, 學習神嘅愛繼而去愛人愛自己嘅地方~
慢慢… 仲有透過靈修、祟拜等, 神經常直接同我對話。喺2021年我開始回復正軌, 終於體會同明白到喺神入面可以有盼望係咩一回事!「萬世君王，從黑暗世代裡，綻放出光芒照亮著前路，被擄得釋放，瞎眼全然看見，願我心抓緊信念，見證你恩典。」
近日有朋友介紹睇咗一段基督教嘅微電影, 片內有段對白令我好深刻 ─ 「在我的世界裡, 只有一種混濁… 不管怎麼努力, 好像也擺脫不了。但是一直有一絲微光, 透進我世界, 我好想去看看那是什麼。」我都希望有一日, 神用我去帶呢一絲微光, 透進別人嘅世界, 能夠讓佢都好想去睇睇神嘅「光」💡
文 / 文姐姐．幹事 2021
《愛·回家》
大家好！我係2019年12月先加入青少部嘅童工～既然咁Green我就介紹一下自己啦！(☺怕羞)
我自小學2年級就喺恩福大(不能說的秘密:當時恩福堂仲喺秋創),所以｢我的家 就是在這裡｣呢句唔係歌詞, 係真架！不過細嗰時其實我唔愛回家架🙈 全～因～為～我～(背景音樂:全因為祢)係典型信三代, 都係被屋企人迫返教會... 每個星期日晨咁早起身返教會對當時嘅我黎講係冇方向、冇意義、冇內容... (初中嘅你係咪好有共鳴?! Yo🤘I know that feel Bro~) 直至去到中四有少少改變... 我跟教會去暑期營, 喺camp中我感受到神，感受到歸屬感, 感受到愛, 於是開始愛回家了。
不過一眨眼就去到我踏入呢個社會喇～當時因為又要翻學又要實習, 又忙又攰, 我離家出走咗5年… 大個女, 終於可以自己做決定！有翻d私人空間！終於free喇！｢唔洗返教會｣個時真係覺得好爽！繼續做我嘅事業型女性, 繼續享受被公司睇重我嘅感覺。我唔係d貪慕虛榮同重階級嘅人, 但呢D卻切切實實咁比我感覺到被肯定、認同、欣賞。然而工作量越嚟越多, 壓力越嚟越大 (大到就連離左職3年後都仲夢到做緊嗰d工作)… 慢慢人生只剩餘工作... 完全三步不出家門, 如非必要, 所有人都唔想接觸... 心裡越嚟越多怨氣, 翻工唔開心, 但我嘅人生就只有翻工... 我開始懷疑人生... 為咩要搞到自己咁辛苦？以後嘅人生要繼續咁過？開始意會到自己只得翻個殼無靈魂... 我知心靈上嘅野無人可以幫到我, 唯有神！
於是我嘗試返翻教會, 但自己一個人返會有d寂寞、空虛、凍家嘛... 我咪邀請埋一個同我有類似經歷嘅基督徒朋友一齊返～返咗一排, 我地都感覺到自己似翻個人！原來呢個時候先係我人生真正嘅轉捩點！之後多次喺敬拜、聽道、靈修中同神直接對話, 我更確切咁感覺到神同在！神更提醒我, 身為基督徒嘅我就係｢要去，使萬民作我的門徒｣, 呢個先係我人生嘅意義！更感恩後來神嘅安排, 帶領我返到恩福呢個家入職做行政部幹事; 然後再帶我返到真真正正係喥長大嘅家 - 12/F青少部。比我可以透過事奉、同你哋一齊經歷, 再一次喺12/F成長。多得「朋友嘅愛」(身體上陪伴)同「神嘅愛」(心靈上陪伴), 我先再｢回到呢個家｣！(片尾曲 -《愛·回家》前主題曲)｢在世間遮風擋雨有一種愛, 從六歲到八十也不更改｣～係呀！我當年嚟恩福係六歲！而嗰一種就係神嘅愛～我真係好｢愛回呢個家｣！💖
文 / 文姐姐．幹事 2020