其實一開始做司事嘅時候，喺當值嗰陣係投入唔到敬拜。因為好怕自己做漏嘢，做錯嘢，所以成個崇拜都會好緊張同擔心。直到要升高中嗰陣都因為呢個原因而選擇留係初中司事隊，等自己星期六崇拜嘅時候可以全心投入敬拜。

 

後來聽到一個牧者分享（唔記得係邊個hehe），事奉團隊應該要有敬拜嘅心先會係崇拜入面有好嘅事奉。提醒到我做司事其實唔應該只係排凳拆板，唔好只著眼喺做嘢，同時要兼顧自己做司事嘅心態。要清楚自己點解要做司事呢個角色，係希望可以幫到弟兄姐妹投入敬拜，令大家返到教會可以感覺好似返到屋企咁被歡迎。但同時都唔好為做而做，忽略自己敬拜神嘅心。去到高中，有幾次幫手合堂崇拜當值，同幫手喺週六崇拜當值，見到其他“資深”啲嘅司事同同工都可以喺當值嘅時候投入敬拜，令我知道投入敬拜唱詩係唔會影響到我司事嘅工作，敬拜同當值係需要共存。唔應該比司事嘅工作影響到自己作為敬拜者嘅身分。

​

小總結：要帶住敬拜嘅心去事奉！

​

文 / Grace．Teen Teen愛神