Cambodia

WhatsApp Image 2019-04-12 at 11.41.35.jp

Wuhan

 
cambo selected 2.JPG
cambo selected 1.jpg

今年青少部主題係send us out go your way, 去柬埔寨好讓我發現上帝係會因着各人唔同嘅恩賜帶領我地去 go our way。雖然我哋都係去同一個地方,但係一團50幾人其實都各有各自己嘅恩賜同埋功用。我哋當中有叻設計嘅,可以負責整傳福音嘅小冊子,吸引當地嘅村民,雖然佢哋唔識題字但係仍然都可以明白到福音; 有好叻同小朋友玩嘅,好讓嗰到既小朋友籍住玩嘅同時,亦可以感受到上帝嘅愛,畢竟一個擁抱、一個微笑、一下拍手,其實呢啲對佢哋嚟講都係好珍貴,因為嗰度嘅街童都好少可以有人走近佢哋又或者見到佢哋嘅需要。而我喺服侍嘅當中亦發現上帝比嘅感動,而呢一份嘅感動就好似係上帝tailor-made俾我咁。

 

由細到大我都係一個好鍾意同人相處嘅人,好鍾意接觸唔同人,關心佢哋嘅需要,同佢哋傾計。因為我成日都覺得接觸生命嘅工作係可以帶嚟好大嘅改變,同時間亦都係最直接可以帶人返去上帝入邊嘅方法。上帝運用呢個恩賜,帶我去到柬埔寨,當我見到呢班嘅小朋友,我心入邊有好大感動。中心入邊嘅小朋友有飽飯食、有學校返,但係我相信呢個世界上冇一個小朋友係唔想同父母一齊,但係住得喺中心入邊嘅小朋友正正就係要同父母分開。佢哋嘅父母當中有吸毒嘅、有飲酒嘅、有家暴嘅,種種原因令到佢哋要同父母分開,呢件事讓我見到跨越肉體,其實佢哋心入面有更大嘅需要。

 

我去到嘅時候認識咗一個十歲叫Lisa嘅女仔,佢比我嘅印象好深刻,唔似得其他嘅小朋友見到任何人都會攬都會黐住,佢卻係由始至終一個星期入面都淨係拖住我、攬住我、同我傾計食飯瞓中午覺。甚至乎最後一日我哋帶成班小朋友去公園玩,玩嘅同時佢都會望下我,玩到攰啦又好似變返bb咁扭眼瞓、嗲下你。認識左佢嘅家庭背景,我知道佢既經歷都真係好唔容易,曾經以為後父接佢返去一家團聚,結果原來係要佢瞓街,唔俾佢入屋企。嗰刻我明白,點解每次瞓晏覺佢都好想黐住我,當有人比佢黐住佢就會好快可以放低份戒心,好快瞓得着。其實佢同中心入面每一個小朋友都一樣好渴望被看見、好想被關心被愛,好想有人聽佢哋講嘢。

 

同呢個小女孩嘅關係讓我見到好多嘅嘢,上帝讓我透過佢見到當地小朋友嘅需要,從而更加清楚嚟緊呢一年會點樣喺當地同宣教士合作開始做一啲輔導嘅工作,好好去運用自己嘅恩賜。而最意想不到嘅係,當我以為自己帶着上帝嘅愛去擁抱呢個女仔,原來上帝同時間都透過呢個小女孩每一個嘅擁抱去話俾我知,上帝對我嘅接納、肯定、同埋愛。我想透過擁抱話比lisa聽,無論以前有幾困難,佢嘅過去同現在甚至將來都係好值得被愛,因為佢本身就係有價值; 然後同時間上帝亦都透過呢個擁抱話俾我聽,原來我嘅過去現在甚至將來雖然都困難,但同樣地都係被上帝愛着。而呢個發現係絕對遠超過我所想所求嘅!

 

我哋成日都會覺得send us out 就係要為上帝去工作,但係其實同時間係工作裏面我哋一樣都會被提醒,一樣都會重新經歷上帝嘅愛,而我覺得呢啲先係最正嘅!

文/Natalie.Gsis  

 

呢趟去武漢嘅旅程絕對唔容易,夏日炎炎,又焗又熱,要喺嗰度一個禮拜真係唔係講笑。我卻依然喺過程中揾到無可替代嘅感動,搵到自己,亦搵到神。短短嘅一個禮拜,好俾我見到神要求嘅,唔係我哋有幾叻幾勁,而係我哋肯服侍嘅心。只要勇敢踏出嘗試嘅一步,其他嘅神係會搞掂㗎!

 

喺武漢入面,我好真切咁感受到神真係會用唔同人去做唔同嘅事。我好記得我哋組負責嗰班入面有一個特別封閉自己嘅小朋友,佢唔同其他小朋友咁肯學唔同嘅英文生字同文法,每次上堂佢都會粒聲唔出,自摺埋一邊。我一直都喺到諗自己有冇嘢可以幫到佢,奈何其實當時已經有兩個組員負責緊佢,講真真係冇我可以幫到手嘅地方。當下我覺得自己好冇用,但係神就喺呢個時間提醒我,的確嗰位小朋友係特別嘅,但係唔代表其他嘅小朋友冇需要、唔需要被關心,佢哋全部都係值得我去花時間了解同關心佢哋嘅可愛嘅小朋友!

 

同佢哋傾計,主動去更認識佢哋嘅時候,我驚訝地發現比我更加細嘅佢哋,竟然比我更樂觀更積極向上。或者我去武漢教識佢哋英文、分擔佢哋嘅憂慮、帶快樂比佢哋,但係佢哋帶俾我嘅卻係更多。當最後一日,佢哋喊晒咁話唔捨得我哋嘅時候,我真係好感動。我睇到神透過我哋走進佢哋嘅生命入面,即使時間只有唔夠七日,但係我哋能夠帶倒一份開心嘅回憶比佢哋,比佢哋知道有一班哥哥姐姐願意去愛佢哋。

 

服侍從來唔係講究我哋嘅能力,只要肯做出嘗試,神自然會用我哋去go his way。雖然冇人可以guarantee我哋係服侍過程一定順利,或者能夠有所得著,但係唔試就一定會失去一個經歷神嘅機會。2018年,江城七月,我遇見一班可愛嘅小朋友,好好嘅teammates,有了一段經歷神嘅旅程,好希望你都可以!

​文/Kate.wifi